|
|
Vao mahita an'i Jao ianao dia mety hihevitra fa karana izy na ny sahalahala amin'izany. Raha mandre azy miteny dia mety hilaza fotsiny izao hoe vazaha miteny gasy ity satria tena miraiki-dela tokoa i Jao. Tsy dia mahagaga izany satria ny fahazazany mihitsy no voavolavola tamin'ny teny frantsay, tamin'ny tontolo frantsay. Nisy fotoana rahateo nipetrahany tany Frantsa. Nahazo anarambositra mihitsy izy mirahalahy tany ambanivolony (Ambohipanja) hoe : Gasy tsy mahay miteny gasy". Niempo ny hambom-pon'ny lehilahy ary mbola tsapany ihany fa Malagasy izy ka nikirizany mafy noho izany ny hamolakà ny tenin-drazany . Io hambom-po haneho ny maha gasy io no isan'ny antony iray nahatonga azy ho mpanoratra. Na izany na tsy izany anefa dia azo lazaina fa ra mikoriana ao amin'izy mianakavy io soratra io. Efa nanana ny lazany manokana i Fredy Rajaofera tamin'ny fotoan'androny. I Fredy Jaofera tokoa mantsy dia tsy i Fredy Rajaofera fa zafikeliny. Malaza eo amin'ny sehatra fanaovan-gazety ny anarana hoe Rajaofera, efa any amin'ny sehatra ny haino aman-jery koa izy amin'izao fotoana izao ary efa tonga any amin'ny politika aza. Mpanao gazety Rajaofera Elise renin'i Jao, manam-pahaizana ambony tao amin'ny asa vaventy ny rainy Rakotomalala Eugène LOUIS, ny 30 Aprily 1962 no tonga teo amin'izao fiainana izao ry zalahy. Roa lahy izy no iray tampo, i Jaofera no zokiny. Telo lahy ny zanaky Fredy Jaofera ankehitriny ary azo antoka fa misy Jaofera koa ny anaran-dry zalahy ireo. I Vero no silaky ny fanahiny ka nampiteny azy hoe : "Nony nisy i Vero, saino sy hevero ary mba diniho ny lalako eto anio, fa zary fitoniana azoko itokiana, zary fanajana, tsy azonao ravana ; zary lamin-tsaina mamelombelon'aina, zary koa fitiavana mitombo toman-davana". Mitana toerana lehibe eo amin'ny fiainan'i Jao ny teny : ny teny Anglisy rehefa mampianatra ny teny Frantsay rehefa miresaka (amin'ny fianakaviana) ; ny teny malagasy rehefa manoratra. |
Mpikambana ao amin'ny fikambanan'ny mpanoratra HAVATSA izy ary niditra tao amin'ny FARIBOLANA SANDRATRA ny 24 Febroary 1991.
..Izay no Fredy JAOFERA atao indray mijery.
_FANAMARIHANA : Tamin'ny Ambioka laharana faha 7 no nampahafantarina an'ILAY kanefa ny tena zavadehibe tamin'ny fiainany no tsy voalazanay ka ialan-tsiny aminy indrindra. Manana silam-panahy izy ka ny vady andefimandrin-dRalaisaholy dia tsy iza fa i HOLY.
Ranoe
NY HAVANA
Haingo raha vory vahoaka,
Fihambo raha toa ka mahay,
Mampiravo fa tsisy mandroaka
' Zany havana mandrakizay.
Tsaroana rehefa mba mifoha,
Ra' ilaozana maha-be alahelo,
Mampitony rehefa indro ny fo
Manimanina sy mamelovelo.
Raha ory dia miaraka ory,
Raha faly dia miaraka faly ;
Ka na aiza na aiza no mbola matory,
Manarina ny potraka omaly.
Mahatsiaro ny kibo niraisana,
Ary manaja izay ra niombonana ;
Tsy esoina na omena ny faisana,
Fa vohaina hatreny an-tokonana.
Tsy mihavana fa misy patsa
Na mitia fa manan-karena ;
Fa dera tsy fantan'ny latsa
Mandravona ireo fahendrena.
Fredy JAOFERA
Paris, 27 janvier 2001
(RAINIZAFIMANGA)
-
TENY ROA
(vetsovetso d'Eric à la soirée des Juniors ARF)
Teny roa dia efa ampy
Ilazako ny ato anaty ;
Teny roa no vatolampy,
Tsy voazera mandramaty.
Teny roa efa afaka
Manambara ny ato am-poko ;
Teny roa tena miavaka,
Mbola meva sy miloko.
Ny voalohany dia ny "tiako",
Ny faharoa dia ny hoe :"ianao" ;
Ka ny hany mbola iriko
Ny fitambarany eto izao.
Mba tia anao ny tena
Ka tsy mahafoy hatrany ;
Ianao no mbola harena,
Tsy voasoloko eto an-tany;
Teny roa...Tsy mihoatra !
No mbola sarotra kosehina ;
Teny roa no mamy loatra,
Tsy hay akoro na potehina.
Tiako ianao !
Eric RAKOTOMALALA
Fredy JAOFERA
Paris, 27 janvier 2001
(RAINIZAFIMANGA)
Eric RAKOTOMALALA 8, rue des Goncourts 75011 Paris tel: 01 43 38 98 09
